Алматы қаласында 2015 жылдың 9-15 сәуірі аралығында «Ұлы Жібек жолы–2015» атты VIII халықаралық кітап және полиграфия көрмесі болып өтті. Көрмеге «Атамұра» баспа корпорациясы жаңа өнімдерімен қатысып, бірқатар басылымдары жүлделі орынға ие болды.

Ирина Серкебаеваның «Бибігүл Төлегенова: сүйіспеншілік, үміт және сенім» атты кітабы «Ұлы Жібек жолы–2015» көрмесінің «Жыл кітабы» бас жүлдесімен марапатталынды.

Көрмеде өткен кітаптың тұсаукесер рәсіміне КСРО Халық артисі Бибігүл Ахметқызының өзі қатысып, оқырмандарына қолтаңба берді. Сонымен қатар көрмеде белгілі жазушы Кәдірбек Сегізбайұлының «Жылдың ең қысқа күндері», балалар жазушысы Тұрдақын Жексенбайдың «Бала бүркіт» атты жаңа туындылары өз оқырмандарымен қауышты. «English 2 Pupil’s book. English 2 Workbook» оқу құралы ең үздік оқулық ретінде танылды. «Балықтар. Қосмекенділер. Жорғалаушылар» еңбегіне көрменің «Ең үздік мектептік энциклопедиялық басылым» жүлдесі берілді.