«Атамұра» прайсы

Жаңалықтар
  • ПӘННІҢ МАҚСАТЫ – ЖАСТАРҒА ПАТРИОТТЫҚ ТӘРБИЕ БЕРУ
    Ұлттық комиссияның 2017 жылдың 26 сәуіріндегі жиналысы шешімімен жалпы білім беретін мектептердің 2018-2019 оқу жылындағы бағдарламасына жаңа «Өлкетану» пәні енгізілді. Аталмыш пән еліміздің барлық мектептерінде оқытылады. «Өлкетанудың» мазмұны «Қазақстан тарихы», «Қазақ әдебиеті», «География» және «Музыка» пәндерімен сабақтас келеді. Оқу пәнінің…
    Посмотреть
  • ҰЛЫ ЖІБЕК ЖОЛЫ – ТІЛДЕР МЕН МӘДЕНИЕТТЕР БАЙЛАНЫСЫ
    Осы жылдың 6 – 8 сәуір аралығында оңтүстік астанамызда «Ұлы Жібек Жолымен -  2017» атты ІХ Халықаралық кітап және полиграфия көрмесі өтті. Аталмыш көрмеге Қазақстанның 100-ден астам компаниялары және алыс шетелден келген компаниялар қатысты. Көрменің басты мақсаты баспагерлердің арасында іскерлік…
    Посмотреть
  • Жаңа кітап үйі
    2016 жылдың қыркүйегінде республикамыздың астанасында «Атамұра» корпорациясының «Алаш» атты екінші кітап үйі өз есігін ашты. Ол Астана қаласы, Есіл ауданы, Сығанақ көшесі, 18/3, №3 тұрғын емес үй-жай мекенжайы бойынша орналасқан. Бұл корпорацияның ең ірі кітап саудасы орталықтарының бірі. Оның аумағы…
    Посмотреть

«Атамұра» баспасы

 

«Атамұра» – полиграфия, баспа ісі, кітап саудасы бойынша маманданған корпорация. 1992 жылы 4 ақпанда құрылған. «Атамұра» корпорациясы тәуелсіз елімізбен бірге өсіп-өркендеп келеді. Ол шағын кәсіпорыннан бастап, жауапкершілігі шектеулі серіктестік, жиырмаға жуық мекемелердің басын біріктірген үлкен корпорацияға дейінгі өсу жолынан өтті.

Бүгінде «Атамұра» корпорациясы: «Атамұра» баспасы, «Атамұра» полиграфия комбинаты, «Атамұраторгснаб» жабдықтау кәсіпорыны, «Атамұра – Информ» транспорт компаниясы, «Атамұра» кітап саудасы департаменті сияқты  кәсіпорындардан, Қазақстанның әрбір облыс орталықтары мен ірі қалаларында ашылған қырықтан астам кітап үйлерінен тұрады.

«Атамұра» баспасы – оқулықтар мен оқу-әдістемелік құралдар, ғылыми, көркем-әдеби, энциклопедиялық басылымдар шығаратын әмбебап баспа. Баспа қазақ және орыс, басқа да шетел тілдерінде жылына таралымы 1,5 млн дана кітаптар мен кітапшалар, 50 млн данадан астам түрлі полиграфиялық өнімдер шығарады.

Әдебиеттер шығарудың бастапқы тақырыптық жоспарына энциклопедиялар, әртүрлі анықтамалықтар мен сөздіктер енгізілген. Баспа ұлы Абайдың 150 жылдық мерейтойы қарсаңында, 1995 жылы «Абай» тұлғалық энциклопедиясын басып шығарды. «Атамұра» баспасы республика аумағындағы әрбір өңірдің табиғатын, экономикасын, мәдениетін, тарихи өткені мен бүгінгі өмірін бейнелейтін әмбебап энциклопедиялар шығарады. Оның алғашқысы Қазақстанның ірі ауылшаруашылықты және өндірісті өлкесі – Ақмола облысына арналған «Ақмола» энциклопедиясы (1995). Одан кейін Маңғыстау өлкесінің тарихи өткені мен бүгіні баяндалатын «Маңғыстау» (1997), Атырау өңірінің сан ғасырлық тарихына арналған «Атырау» (2000), қазақ даласының қақ ортасында орналасқан қазыналы Қарағанды облысы жайлы «Қарағанды. Қарағанды облысы» (2006),  егеменді еліміздің бас қаласы Астананың 10 жылдығына арналған «Астана» энциклопедиялық басылымы (2008), ұлы суреткер «Мұхтар Әуезов» энциклопедиясы (2012) жарық көрді.

Корпорация еліміздің Тұңғыш Президенті Н.Ә. Назарбаевтың қазақ және орыс тілдерінде «Ғасырлар тоғысында», «Тарих толқынында», «Сындарлы он жыл», «Бейбітшілік кіндігі», «Тәуелсіздік белестері», «Еуразия жүрегінде» атты кітаптарын қазақ,орыс тілінде басып шығарды.

Баспа көркем әдебиет туындыларын да шығарумен айналысады. Қазақтың белгілі қаламгерлері Ә. Нұрпейісов, М. Әлімбаев, Қ. Жұмаділов,

Ә. Нұршайықов,   Ш. Мұртаза, Т. Молдағалиев, М. Мақатаев, М. Шаханов,  Қ.Мұхамеджанов, Н. Оразалин, Т. Медетбек т.б. шығармалары «Атамұра» оқырманының қолына тиді.

Солардың ішінде М. Мақатаевтың «Аманат», Т. Медетбектің «Тағдырлы жылдар жырлары», Н. Оразалиннің «Құралайдың салқыны», Ж. Нәжімеденовтің «Менің Қазақстаным» атты жыр жинақтары мен «Абай» энциклопедиясы Қазақстан Республикасының Мемлекеттік сыйлығына ие болды.

«Атамұра кітапханасы» сериясымен 2002 жылдан бастап бүгінгі күнге дейін елімізге белгілі 100-ден астам ақын-жазушының туындылары басылып шықты. «Атамұра кітапханасының» көшін ұлы бабамыз Абайдың «Қалың елім, қазағым» атты өлеңдер жинағы бастады. Шәкәрім, Сұлтанмахмұт, Сәкен, Бейімбет, Ілияс, Ахмет, Жүсіпбек, Мағжан, Міржақып, Мұхтар Әуезов, Ғабит Мүсірепов, Сәбит Мұқанов бастаған классиктеріміз бен айтулы алыптарымыздың, одан бері қарайғы рухани байлығымызды жасаған Қ. Аманжолов, М. Иманжанов, А. Нұрманов,

Т. Ахтанов, Б. Момышұлы, І. Есенберлин, Б. Соқпақбаев, Ғ. Қайырбеков, Ә. Кекілбаев, Қ. Мырзалиев, Ф. Оңғарсынова,  С. Жүнісов   тағы  басқа  қарымды  қаламгерлеріміздің, О. Бөкей, К. Мырзабеков,

Ж. Жақыпбаев, М. Қабанбай, А. Егеубаев сияқты  ортамыздан тағдыр ерте алып кеткен дара дарындарымыздың кезінде оқырман қауым тарапынан ерекше бағаланған таңдаулы шығармалары кітап болып шықты.

Өмірден өткен белгілі тұлғаларға арналған естелік кітаптарды жариялауды да естен шығарған емеспіз. Мәселен, Қалтай Мұхамеджанға, Камал      Смайылға, Қасым         Қайсеновке,        Манаш Қозыбаевқа, Салық Зимановқа, Тұрсынхан Әбдірахмановаларға т.б. арналған бірдей көлемдегі естелік кітаптарды басып шығардық.

Баспа қызметінің тағы бір саласы – ғылыми әдебиеттер басып шығару. Белгілі әдебиетші, абайтанушы-ғалым Қ. Мұқаметхановтың «Абай мұрагерлері» (1995) атты зерттеу еңбегі, М. Тәтімовтің «Қазақ әлемі» (1993), М. Мырзахметовтың «Қазақ қалай орыстандырылды» кітабы (1993), А. Сейдімбектің «Көшпелілер тарихы» (1994), К. Есмағамбетовтің «Қазақтар шетел әдебиетінде» (1994), Т. Кәкішевтің «Кер заманның кереғар ойлары» (1995) кітаптары, көне заманнан бүгінгі дейінгі «Қазақстан тарихының» қазақша, орысша 5 томы (2010), Х. Арғынбаев,

М. Мұқанов, В. Востровтың «Қазақ шежіресі хақында» (2010) т.б. ғылыми-танымдық еңбектері, академик С. Зимановтың «Қазақтың билер соты – бірегей сот жүйесі» (2008) атты зерттеу еңбегі қазақ, орыс, түрік және ағылшын тілдерінде жарық көрді.

Баспадан қазақ халқының мәдениеті мен өнері, салт-дәстүрлері мен әдет-ғұрыптары, дастарқаны туралы қазақ, орыс, ағылшын тілдерінде «Қазақ дастарқаны» («Қазақтың ұлттық тағамдары»), «Қазақ тазысы», «Қазақтың салт-дәстүрлері мен әдет-ғұрыптары», «Қазақ әндері», «Қазақтың мақал-мәтелдері» деп аталатын әсем безендірілген кітаптар басылып шықты.

«Менің алғашқы кітапшам» сериясымен қазақ және орыс тілінде 50-ге тарта түрлі түсті суретті ертегі кітаптар бүлдіршіндерге жол тартты. «Мектеп энциклопедиясы» сериясымен мектеп жасындағы балаларға арналған «Қазақстанның жануарлар әлемі» туралы танымдық басылымдар оқырмандарымен табысты. Осы серия бойынша жарық көрген басылымдар қатарында «Сүтқоректілер», «Құстар», «Бунақденелілер», «Балықтар. Қосмекенділер. Жорғалаушылар» және еліміздің табиғаты жайлы «Қазақстан гүлдері» сынды энциклопедиялар, мазмұны бай әрі озық үлгімен әзірленген кітаптар бар.

2013 жылдан бастап «Атамұрадан» жалпы орта білім беру мекемелеріне арналған «Атамұра» мектеп кітапханасы» сериясы шығарыла бастады.

Білім  саласында жаңа жобаларды сәтті жүзеге асырғаны, баспа өнімдерін жоғары сапаға көтергені, әлеуметтік-гуманитарлық бағдарламаларға белсенді қатысқаны үшін «Атамұра» корпорациясы бірнеше халықаралық және отандық марапаттарға ие болды. Оның қатарында Қазақстан Республикасы Президентінің «Құрмет» дипломы, Өндіріске ықпал ету ассоциациясының Алтын медалі (Париж), Халықаралық Алтын Жұлдыз (Женева), «Хрусталь рыцары» дипломы (Мальта), Халықаралық «Quality Summit» дипломы (Нью-Йорк),  «Golden  Europe award for quality commercial prestige» (Париж) сыйлықтары және "Алтын жұлдыз" "Елдің үздік баспасы" дипломы т.б.  бар. Сонымен бірге корпорация полиграфия және кітап басу саласындағы жетістіктері үшін халықаралық кітап жәрмеңкелері мен көрмелерінің 50-ден астам дипломдарының иегері атанды.

«Атамұра» баспа корпорациясы осындай еселі еңбегімен елге танылып, бүгінде кітап шығару, полиграфия ісінде республикамыздың маңдайалды баспаларының бірі саналады.